Էլեն Սեգարան, Պատրիկ Ֆիորին եւ Էնրիկե Իգլեսիասը հայ աստղերի հետ ելույթ կունենան Tashir 2013 գալա-համերգին:{V}

Մայիսի 18-ին Մոսկվայի Կրեմլի պետական պալատում կկայանա գալա-համերգ՝ նվիրված հայ երաժշտարվեստի ոլորտի «Tashir 2013» ազգային մրցանակաբաշխությանը: Այդ մասին նշված է «Tashir 2013»-ի պաշտոնական կայքում:

«Tashir 2013»-ը ազգային մրցանակաբաշխություն է՝ հայկական երաժշտարվեստի ոլորտում նշանակալի ներդրման համար, որն ուղղված է աշխարհում հայկական ստեղծագործական լավագույն ներկայացուցիչների օժանդակությանը: Ամենավառ երաժիշտներն ամբողջ աշխարհից կհավաքվեն մեկ հարկի տակ՝ Կրելմի պետական պալատում, որպեսզի ռուսական մայրաքաղաքի հանդիսատեսին դասական եւ ժամանակակից երաժշտարվեստի միախառմամբ շոու ներկայացնեն: «Tashir 2013» մրցանակների հանձնման առիթով գալա-համերգի ծրագրին կմասնակցեն աստղեր Ռուսաստանից եւ Եվրոպայից. Մարգարիտա Պոզոյանը, Նիկոլայ Բասկովը, Սոֆիա Ռոտարուն, Աբրահամ Ռուսոն, Քրիստինա Օրբակայտեն, Լյուբով Ուսպենսկայան, ինչպես նաեւ աշխարհահռչակ երաժիշտ Ջիվան Գասպարյանը:

Հայկական ժամանակակից երաժշտարվեստի վառ ներկայացուցիչների շարքում ելույթ կունենան միջազգային Grammy եւ World Music Awards մրցանակների դափնեկիր Արտո Թունջբոյաջյանը եւ Armenian Navy Band ավանգարդ ֆոլք-ջազ խումբը, 2008 եւ 2009 թվականների «Եվրատեսիլ»-ի մասնակիցներ, երգչուհի Սիրուշոն, ինչպես նաեւ Ինգա եւ Անուշ ավանգարդ ֆոլք-դուետը: Ծրագրի իսկական զարդը կդառնան «Notre Dame de Paris» մյուզիքլի ճանաչված կատարողներ Էլեն Սեգարան եւ Պատրիկ Ֆիորին:

«Tashir 2013»-ի հոբելյանական գալա-համերգի գլխավոր անակնկալը կլինի հատուկ հյուրը՝ աշխարհի ամենահայտնի լատինաամերիկյան կատարող, ճանաչված երգիչ Էնրիկե Իգլեսիասը:

«Ռուսաստանի եւ ԱՊՀ-ի իմ երկրպագուներն ինձ միշտ ջերմ ընդունելություն եւ աջակցություն են ցուցաբերել, եւ ինձ համար մեծ պատիվ է ելույթ ունենալ Կրելմի

պալատում անցկացվելիք «Tashir 2013» երաժշտական մրցանակաբաշխությանը»,- հայտարարել է Էնրիկե Իգլեսիասը:

Միաժամանակ, հատուկ «Tashir 2013»-ի համար կոմպոզիտոր Տոլիբհոն Շահիրին հանդիսատեսին կներկայացնի նորովի ստեղծված ռապսոդիան՝ երկխոսություն դաշնամուրի եւ սիմֆոնիկ մեծ նվագախմբի համար՝ Արամ Խաչատրյանի մոտիվներով, որը նվիրված է հայ ճանաչված կոմպոզիտորի 110-ամյակին: Ստեղծագործությունը կատարվելու է առաջին անգամ:

Մրցանակաբաշխությունը վարելու են Վիկտորիա Լոպիրեւան, Անդրեյ Մալախովը, Գարիկ Մարտիրոսյանը, Տատյանա Գեւորգյանը: «Tashir 2013» մրցանակաբաշխության գալա-համերգն ուղիղ եթերով հեռարձակելու է Armenia TV հեռուստաընկերությունը եւ հասանելի է լինելու Հայաստանի բոլոր հեռուստադիտողներին:

2013 թվականին «Tashir 2013» մրցանակ կշնորհվի հետեւյալ անվանակարգերում. «Լավագույն զուգերգ», «Լավագույն երգչուհի», «Լավագույն երգիչ», «Տարվա առաջընթաց», «Հայաստանի բարեկամ»: «Tashir 2013» մրցանակաբաշխությանը ներկայացված են Թաթա Սիմոնյանը, Արման Հովհաննիսյանը, Արմենչիկը, Սիրուշոն, Լիլիթ Հովհաննիսյանը, Քրիստինե Պեպելյանը, Մարտին Մկրտչյանը, Կամո Սեյրանյանը, Ռազմիկ Ամյանը, Ինգան եւ Անուշը: